Albania News Agency

Presidenti ukrainas Zelenski deklaroi se ushtria ruse gjatë orëve të natës ka goditur në Kiev një spital me repart shtrimi që ishte aktivisht në funksion. Ai bëri të ditur se për shkak të sulmit pacientët janë evakuuar, ka të plagosur dhe një viktimë.

“Fatkeqësisht, një person humbi jetën. I shpreh ngushëllimet e mia familjes dhe të afërmve të tij. Të gjithë ata që kanë nevojë për ndihmë po marrin mbështetjen e nevojshme”, tha Zelenski.

Duke theksuar se ukrainasit do ta rindërtojnë spitalin pavarësisht sulmit, Zelenski shtoi se ekipet e riparimit, specialistët e energjisë dhe të gjitha shërbimet bazë po vazhdojnë punën në zonat ku ka dëme të reja dhe ndërprerje të energjisë elektrike të shkaktuara nga ushtria ruse.

Zelenski njoftoi se gjatë natës janë lëshuar 165 dronë sulmues, rreth 100 prej tyre të tipit “Shahed”, duke theksuar se çdo ditë nevojitet mbështetje për mbrojtjen ajrore, prodhimin e dronëve interceptues dhe infrastrukturën energjetike.

Ai shtoi se gjatë kësaj jave do të vazhdojnë kontaktet me partnerët evropianë dhe amerikanë për sigurimin e ndihmës që i nevojitet Ukrainës dhe falënderoi të gjithë ata që mbështesin vendin dhe popullin e tij.