Albania News Agency

Presidenti i Ukrainës, Volodymyr Zelensky, deklaroi se Rusia kreu gjatë natës një nga sulmet më të mëdha me raketa balistike kundër Kievit, duke theksuar se shumica e raketave kishin në shënjestër kryeqytetin.

Duke bërë bilancin e sulmit, Zelensky tha: «Deri tani është raportuar për një të vdekur dhe 16 të plagosur në Kiev dhe rajonin përreth. U shpreh ngushëllimet e mia të gjitha familjeve dhe të afërmve. Të gjithë të prekurit po marrin kujdesin e nevojshëm mjekësor.»

Zelensky bëri të ditur se operacionet emergjente vazhdojnë në tre pika, ku janë angazhuar rreth 600 punonjës të shërbimeve të emergjencës, ndërsa shërbimet përkatëse po punojnë edhe në rajonin e Odesës.

Duke iu referuar statistikave javore të sulmeve, Zelensky tha: «Në total, gjatë kësaj jave Rusia përdori kundër Ukrainës rreth 1450 dronë sulmues, mbi 1640 bomba ajrore të drejtuara dhe 99 raketa të llojeve të ndryshme.»

Duke renditur edhe rajonet e tjera të prekura, Zelensky shtoi: «Ka të plagosur në rajonet e Odesës dhe Zaporizhzhias, ndërsa dëme janë regjistruar në rajonet Sumy dhe Chernihiv. Gjatë kësaj jave, rajonet Vinnytsia, Dnipro, Donetsk, Zhytomyr, Kirovohrad, Mykolaiv, Poltava, Kharkiv, Kherson dhe Cherkasy u sulmuan gjithashtu nga Rusia.»