Albania News Agency

Volodymyr Zelensky deklaroi se Ukraina po kalon një nga momentet më të vështira në historinë e saj, pasi Donald Trump kërkoi që Kievi të pranonte një “plan paqeje” që brenda pak ditësh do ta detyronte vendin të dorëzonte territore ndaj Rusisë me mbështetjen e SHBA-së dhe të bënte lëshime të tjera të dhimbshme.

Trump të premten në mëngjes konfirmoi se e enjtja e ardhshme do të ishte një afat “i pranueshëm” për Zelenskyn për ta nënshkruar marrëveshjen. Zyrtarë ukrainas dhe europianë thanë se marrëveshja praktikisht do të nënkuptonte “dorëzim”.

Në një fjalim 10-minutësh para pallatit presidencial, Zelensky deklaroi se vendi i tij është përballë një zgjedhjeje të pamundur. Ukraina rrezikon të humbasë një partner kyç – SHBA-të – administrata e të cilave duket e vendosur ta përfundojë konfliktin sipas kushteve të Moskës.

Zelensky tha se pranimi i planit SHBA–Rusi mund ta linte Ukrainën “pa liri, dinjitet dhe drejtësi”. Gjithashtu “do të thoshte të besonim dikë që na ka sulmuar dy herë”, shtoi ai, duke theksuar se Ukraina nuk do të sakrifikojë kurrë interesat e saj dhe nuk do të veprojë kundër kushtetutës.

Duke folur në Fox Radio, Trump tha se e konsideron të enjten “kohë të përshtatshme” për nënshkrimin e marrëveshjes dhe se ai beson se Ukraina nuk mund të ndalojë ushtrinë ruse të marrë me forcë territorin e Donbasit.

Zyrtarët amerikanë deklaruan se presidenti amerikan po ndjek një “afat agresiv” për përfundimin e konfliktit dhe planifikon t’i bëjë presion të paparë Kievit.

Trump gjithashtu po kërcënon të ndërpresë shkëmbimin jetik të inteligjencës dhe furnizimin me armë nëse Ukraina nuk arrin marrëveshjen.