Albania News Agency

Sipas CCTV, 28 persona humbën jetën nga zjarri në fabrikën e këpucëve të kompanisë Huiteng Shoes Co., Ltd., në qytetin Jinjiang të provincës Fujian në Kinën lindore.

Autoritetet lokale njoftuan se zjarri shpërtheu të enjten në orën 12:04 në katin përdhes të fabrikës në qytezën Chendai. Në operacionet e shuarjes së zjarrit dhe shpëtimit morën pjesë më shumë se 500 zjarrfikës dhe 35 automjete zjarrfikëse.

Në momentin e zjarrit në fabrikë ndodheshin 237 punonjës dhe dy punonjës të jashtëm të shpërndarjes. U evakuuan 213 persona. Dy persona të dërguar në spital humbën jetën pavarësisht ndërhyrjeve mjekësore, ndërsa 26 persona të raportuar si të zhdukur u gjetën të pajetë.

Sipas raportimeve, policia ndaloi pronarin e fabrikës dhe disa persona të dyshuar si përgjegjës për zjarrin, ndërsa llogaritë bankare të kompanisë u ngrinë.

Autoritetet e provincës Fujian krijuan një grup të posaçëm koordinues për operacionet e shpëtimit, hetimin e aksidentit dhe vlerësimin e dëmeve. Hetimet për shkakun e zjarrit dhe përcaktimin e përgjegjësve vazhdojnë.

Autoritetet thanë se materialet shumë të ndezshme të prodhimit të këpucëve, të ruajtura në katin përdhes të fabrikës pesëkatëshe prej betoni të armuar, bënë që flakët të përhapeshin me shpejtësi.