Albania News Agency

Apple konfirmoi se, me urdhër të autoriteteve, ka hequr nga App Store-i kinez dy nga aplikacionet më të njohura të komunitetit homoseksual – Blued dhe Finka.

Zëdhënësi i kompanisë deklaroi: “Ne respektojmë ligjet e vendeve ku operojmë. Me urdhër të Administratës së Hapësirës Kibernetike të Kinës, i kemi hequr këto dy aplikacione vetëm nga dyqani kinez.”

Kjo lëvizje ka shkaktuar shqetësim në mesin e komunitetit LGBT në vend.

Anëtarët e komunitetit LGBT shprehën shqetësim për heqjen e Blued dhe Finka. Njëri prej tyre tha: “Shpresoj që politikanët heteroseksualë të kuptojnë se dashuria është diçka e rrallë, jo e turpshme apo e ndaluar.”

Një version “i lehtë” i Blued mbetet i disponueshëm në App Store-in kinez. Aplikacione të tjera si Jicco dhe Jack’d janë ende të pranishme në vend.

Blued është një nga aplikacionet më të përdorura për njohje homoseksuale në Kinë, me dhjetëra miliona shkarkime.

Apple operon një App Store të veçantë në Kinë në përputhje me ligjet e rrepta të internetit të vendit. Aplikacione të njohura si Instagram dhe WhatsApp nuk janë të disponueshme në Kinë.

Përdoruesit e Android përdorin versione lokale të sistemit operativ, pasi Google Play Store është i bllokuar në Kinë.