Albania News Agency

Vendet vunë në dukje rastet gjithnjë e më të shpeshta javët e fundit, kur Rusia ka ndjekur, ka ndërhyrë dhe ka ndërprerë sinjalet e satelitëve në hapësirë.

Ministri gjerman i mbrojtjes, Boris Pistorius, deklaroi në konferencën e liderëve të industrisë hapësinore në Berlin në shtator: “Veprimet e Rusisë në hapësirë përbëjnë një kërcënim themelor për të gjithë ne. Është një kërcënim që nuk mund ta injorojmë më.”

Sipas institutit të studimeve globale RAND, synimi ndaj satelitëve të komunikimit mund të ndikojë në fusha si imazhet satelitore, telekomunikacioni dhe qasja në internet me brez të gjerë. Shkatërrimi i sistemeve të navigimit dhe pozicionimit mund të ndikojë si në operacionet ushtarake ashtu edhe në aviacionin civil.

Zyrtarët ukrainas deklaruan se Moska po rrit nivelin e bashkëpunimit me Kinën dhe se Pekini po kryen misione zbulimi satelitor mbi territorin e Ukrainës në emër të Moskës.

Pistorius shtoi se kohët e fundit janë vërejtur dy satelitë zbulues rusë që po ndiqnin dy satelitë të IntelSat, të përdorur nga Forcat e Armatosura Gjermane dhe aleatët e tyre. IntelSat është një ofrues komercial shërbimesh satelitore, flota e të cilit përdoret nga qeveri dhe kompani në SHBA dhe Evropë.