Albania News Agency

Senati ndërmori një hap të rëndësishëm drejt rihapjes së qeverisë duke kapërcyer bllokimin e demokratëve për ligjin e financimit me 60 vota kundrejt 40.

Pasi tetë senatorë demokratë pranuan një marrëveshje që përfshin një votim të mëvonshëm për zgjatjen e subvencioneve për kujdesin shëndetësor dhe garanci për rikthimin në punë të punonjësve federalë të pushuar gjatë mbylljes, senatorët më në fund kapërcyen bllokimin pesë-javor.

Demokrati Dick Durbin, së bashku me senatorët Catherine Cortez Masto, John Fetterman, Maggie Hassan, Jeanne Shaheen, Tim Kaine, Jacky Rosen dhe senatorin e pavarur Angus King, u ndanë nga drejtuesit e demokratëve për të avancuar paketën.

Kjo konsiderohet si përparimi i parë pas 40 ditësh ngecjeje.

Marrëveshja mund të hapë rrugën për rifillimin e plotë të shërbimeve qeveritare në mbarë SHBA-në.

Megjithatë, mbeten ende disa pengesa. Marrëveshja duhet gjithashtu të miratohet nga Dhoma e Përfaqësuesve, dhe demokratët që e kundërshtojnë mund ta ngadalësojnë procesin.

Gjatë javëve të fundit, qindra mijëra punonjës të qeverisë kanë mbetur pa paga dhe shërbimet publike janë ndërprerë në mbarë vendin.