Albania News Agency

Kryeministri i Kanadasë, Mark Carney, prezantoi planin e tij kombëtar për t'i dhënë fund të pastrehëve brenda 10 viteve, duke ndarë rreth 30 miliardë dollarë për luftën kundër këtij problemi në kuadër të Buxhetit të vitit 2026.

Në një deklaratë të përbashkët me kryeministrin e provincës Manitoba, Wab Kinew, dhe kryetarin e Bashkisë së Winnipegut, Scott Gillingham, kryeministri Mark Carney njoftoi se në fazën e parë të planit Manitoba do të marrë mbi 1 miliard dollarë mbështetje federale.

Në kuadër të bashkëpunimit do të ndërtohen më shumë se 2 mijë njësi banimi me shërbime mbështetëse dhe banesa kalimtare. Gjithashtu, në Winnipeg do të krijohet një qendër e re që do të ndërthurë shërbimet e shëndetit mendor dhe trajtimit të varësive me mbështetjen për strehim. Përmes këtyre projekteve synohet të realizohen gjithsej deri në 2 500 njësi të reja banimi në Winnipeg.