Albania News Agency

Presidenti i Bullgarisë Radev njoftoi se dy anije tregtare u sulmuan në zonën ekskluzive ekonomike të vendit në Detin e Zi.

Në një postim në rrjetet sociale, Radev tha se po zhvillohet një operacion shpëtimi rreth 70 milje detare në lindje të qytetit Byala, brenda zonës ekskluzive ekonomike të Bullgarisë.

Radev deklaroi se rreth orës 03:00 të natës dy anije tregtare u sulmuan nga mjete detare dhe ajrore pa pilot. Ai bëri të ditur se anija e parë me flamur të Togos u fundos, ndërsa e dyta u dëmtua dhe mori flakë.

Radev tha se ekuipazhi i anijes së dytë, përfshirë marinarë të plagosur, u evakuua dhe u shpëtua nga një anije bullgare, ndërsa deri tani nuk është gjetur askush nga personat që ndodheshin në anijen e parë.

Radev e cilësoi sulmin e ndodhur në zonën ekskluzive ekonomike të Bullgarisë si “absolutisht të papranueshëm”, duke thënë se ngjarja përbën një shkelje serioze të së drejtës detare dhe ndërkombëtare dhe do ta rrezikojë edhe më shumë lundrimin e sigurt në Detin e Zi.

Radev paralajmëroi se nëse lufta nuk përfundon, konflikti do të vazhdojë të zgjerohet gjeografikisht dhe të intensifikohet, duke rritur rrezikun e një përplasjeje më të gjerë, potencialisht në shkallë globale.