Albania News Agency

Ministri i Jashtëm i Greqisë, George Gerapetritis, bëri deklarata pas takimit me Sekretarin amerikan të Shtetit, Marco Rubio, në Athinë. Gerapetritis njoftoi fillimin e raundit të gjashtë të Dialogut Strategjik mes dy vendeve, gjatë të cilit u diskutuan thellimi i mëtejshëm i marrëdhënieve, forcimi i lidhjeve transatlantike, si dhe stabiliteti rajonal dhe ndërkombëtar.

Duke theksuar se bashkëpunimi në fushat e energjisë dhe tregtisë ka arritur nivele të paprecedenta, Gerapetritis tha se Greqia luan një rol të rëndësishëm në transportimin e gazit natyror të lëngshëm amerikan drejt Evropës Qendrore dhe Lindore. Ai bëri të ditur se flota tregtare detare me bazë në Greqi realizon më shumë se 20 për qind të transportit global të LNG-së. Gerapetritis shtoi se prania e kompanive amerikane të energjisë dhe investimet në teknologji të lartë në vend po rriten.

Në lidhje me bashkëpunimin në mbrojtje, Gerapetritis theksoi rëndësinë strategjike të Sudës dhe Aleksandrupolisit për praninë amerikane në rajon. Ai deklaroi se modernizimi i flotës së avionëve F-16 Viper dhe integrimi i avionëve luftarakë F-35 në Forcat Ajrore Greke po forcojnë bashkëpunimin në mbrojtje mes dy vendeve.

Gerapetritis tha se me Rubion diskutuan konfliktet në Lindjen e Mesme, Ukrainë dhe Afrikën Nënsahariane, si dhe ndikimin e këtyre zhvillimeve në situatën humanitare dhe lëvizjet migratore. Ai theksoi se siguria e transportit detar dhe liria e lundrimit ishin gjithashtu tema të rëndësishme të takimit. Gerapetritis deklaroi se ruajtja e stabilitetit në Mesdheun Lindor dhe garantimi i sigurisë së komuniteteve të ndryshme fetare janë përparësi të përbashkëta për Greqinë dhe SHBA-në.

Duke iu referuar rëndësisë së perspektivës evropiane të Ballkanit Perëndimor, Gerapetritis theksoi se rruga evropiane e rajonit është e rëndësishme jo vetëm për mirëqenien, por edhe për parandalimin e rishfaqjes së nacionalizmit.