Albania News Agency

Ish-presidentët demokratë Barack Obama dhe Bill Clinton reaguan ndaj vrasjes së infermieres 37-vjeçare Alex Pretti, e qëlluar për vdekje nga agjentët e ICE në Minneapolis; kjo ishte viktima e dytë e vrarë këtë muaj nga zyrtarë federalë të emigracionit në qytet.

Në një deklaratë të publikuar të dielën, Obama dhe bashkëshortja e tij Michelle e cilësuan vrasjen e Alex Pretti-t si një “tragjedi zemërthyese” dhe “një paralajmërim për çdo amerikan, pa dallim partie, se vlerat tona themelore si komb po vihen gjithnjë e më shumë nën sulm”.

Deklarata thekson se njerëzit në mbarë vendin prej javësh janë me të drejtë të zemëruar për faktin që agjentë të maskuar të ICE-s dhe zyrtarë të tjerë federalë veprojnë pa ndëshkim dhe përdorin taktika që duken të dizajnuara për të frikësuar, ngacmuar, provokuar dhe vënë në rrezik banorët e një qyteti të madh amerikan.

Bill Clinton iu bashkua gjithashtu këtij thirrjeje duke shkruar në X se SHBA po përballet me një moment historik që do ta formësojë vendin në vitet e ardhshme dhe u bëri thirrje amerikanëve të ngrenë zërin për të “treguar se kombi ynë ende i përket popullit”.