Albania News Agency

Në deklaratën e Ministrisë së Punëve të Jashtme dhe Çështjeve Evropiane të Republikës së Kroacisë theksohet rëndësia e zgjidhjes së mosmarrëveshjeve kufitare dhe dypalëshe ndërmjet Kroacisë dhe Malit të Zi për procesin e anëtarësimit të Malit të Zi në Bashkimin Evropian (BE).

Deklarata nënvizon se parimi i marrëdhënieve të mira fqinjësore është një nga kriteret themelore politike si në Kuadrin e Negociatave për vendet kandidate, ashtu edhe në politikën e zgjerimit të BE-së. Gjithashtu rikujtohet se Bashkimi nuk dëshiron të importojë mosmarrëveshje dypalëshe në strukturat e tij dhe se çështjet e pazgjidhura ndërmjet palëve duhet të zgjidhen sa më shpejt.

Ministria e Punëve të Jashtme e Kroacisë paralajmëroi se moszgjidhja e këtyre problemeve mund të ndikojë negativisht si në marrëdhëniet dypalëshe mes dy vendeve, ashtu edhe në negociatat e Malit të Zi për anëtarësim në BE.