Albania News Agency

Bashkimi Evropian dhe Kanadaja kanë ndërmarrë një hap strategjik për të forcuar përgatitjet në fushën e shëndetësisë dhe zinxhirët e furnizimit.

Komisionerja Evropiane për Ndihmën Humanitare dhe Menaxhimin e Krizave, Hadja Lahbib, njoftoi në një postim se BE-ja dhe Kanadaja po thellojnë bashkëpunimin për gatishmërinë shëndetësore dhe se, së bashku me ministren kanadeze të Industrisë, Melanie Joly, kanë nisur Dialogun e parë Ministror për Kundërmasat Mjekësore.

Në këtë takim të parë në nivel ministror u theksuan mësimet e nxjerra nga pandemia COVID-19 dhe rëndësia jetike e bashkëpunimit gjatë krizave globale shëndetësore. Në fjalën e saj, Lahbib deklaroi: “COVID-19 na mësoi se kur vendet veprojnë të vetme, humbasim kohë, ndërsa kur punojmë së bashku, shpëtojmë jetë. Në një botë ku një virus mund të kalojë Atlantikun po aq lehtë sa një avion, duhet të përgatitemi së bashku për t'i dalluar rreziqet më herët dhe për të vepruar më shpejt.”

“HERA dhe HERC janë partnerë të natyrshëm”

Duke tërhequr vëmendjen te ngjashmëritë strukturore dhe në emërtim ndërmjet Autoritetit Evropian për Gatishmërinë dhe Reagimin ndaj Emergjencave Shëndetësore (HERA) dhe strukturës përkatëse kanadeze HERC, Lahbib deklaroi se këto dy institucione janë partnerë të natyrshëm.

Përmes mekanizmave të krijuar synohet rritja e kapaciteteve të prodhimit të vaksinave dhe barnave, si dhe dërgimi i shpejtë i materialeve mjekësore kritike te njerëzit në momentin kur ato nevojiten.

Në kuadër të kësaj nisme gjithëpërfshirëse, palët shprehën vendosmërinë për të forcuar zinxhirët e furnizimit dhe për të rritur nivelin e gatishmërisë ndaj kërcënimeve kimike, biologjike, radiologjike dhe bërthamore (KBRB).

Njëkohësisht, synohet mbështetja e aktiviteteve të kërkimit dhe zhvillimit dhe forcimi i bashkëpunimit civilo-ushtarak. U theksua se në këtë periudhë të rritjes së rreziqeve globale, miqësia dhe besimi i ndërsjellë po shndërrohen në hapa konkretë.