Albania News Agency

Lazzarini theksoi se gjatë gjithë luftës në Gaza, ekipet e UNRWA-së kanë vazhduar me vendosmëri të kërkojnë mënyra për të ndihmuar popullsinë.

Ai tha se tashmë aktivitetet janë zgjeruar dhe ekipet mjekësore trajtojnë çdo ditë rreth 15 mijë pacientë. “Po zgjerojmë shërbimet e shëndetit publik. Ekipet tona sigurojnë qasje në ujë të pastër dhe mbledhin e asgjësojnë mbetjet e ngurta që përbëjnë rrezik të madh shëndetësor”, deklaroi ai.

Lazzarini shtoi se këshilltarët psikosocialë organizojnë seanca ditore mbështetjeje për t’u ndihmuar njerëzve të përballojnë traumat e shkaktuara nga lufta dhe humbjet.

“Mësimi me prezencë fizike po rritet çdo ditë; sot arrijmë pothuajse 50 mijë fëmijë, ndërsa mësimet online vazhdojnë për shumë më tepër nxënës. Stafi ynë zhvillon rregullisht sesione ndërgjegjësimi për të parandaluar humbjen e jetëve nga sasia e madhe e municioneve të pashpërthyera të shpërndara në Gaza.”

Ai tha gjithashtu: “UNRWA operon jashtëzakonisht me kosto efektive si një organizatë që punon pa ndërmjetës. Më shumë se kurrë, është e nevojshme heqja e kufizimeve dhe pengesave aktuale në mënyrë që të mund të përgjigjemi ndaj nevojave më kritike dhe të kontribuojmë në stabilitet.”