Albania News Agency

Manus, e cila pasi u themelua në Kinë u zhvendos në Singapor, nxori në treg në fillim të këtij viti produktet e para të përgjithshme të AI që mund të kryejnë detyra të ndërlikuara si kërkimi i tregut, kodimi dhe analiza e të dhënave.

Në deklaratën e kompanisë thuhet se vetëm tetë muaj pas lansimit ajo arriti të gjenerojë të ardhura mesatare vjetore mbi 100 milionë dollarë, ndërsa këtë vit të ardhurat kanë tejkaluar 125 milionë dollarë.

Meta tha se qëllimi i blerjes është të përshpejtojë inovacionin e AI për bizneset dhe të integrojë automatizim të avancuar në produktet e saj për konsumatorët dhe ndërmarrjet, përfshirë Meta AI, duke shtuar: “Manus tashmë po u shërben nevojave të përditshme të miliona përdoruesve dhe bizneseve në mbarë botën… Ne planifikojmë ta shtrijmë këtë shërbim te shumë më tepër biznese.”

Edhe pse kushtet e tjera të marrëveshjes nuk u bënë të ditura, Wall Street Journal raportoi, duke cituar burime pranë blerjes, se marrëveshja është përmbyllur me një shumë mbi 2 miliardë dollarë. Raporti shtoi se start-up-i, përballë ofertës së Meta-s, po kërkonte një raund të ri financimi me vlerësim 2 miliardë dollarë.

Manus filloi si një produkt i start-up-it kinez Butterfly Effect, i njohur edhe si Monica.Im, përpara se të bëhej një entitet i veçantë. Në fillim të këtij viti, ai u shfaq si një lojtar i spikatur i AI, duke tërhequr vëmendje pasi pretendoi se chatbot-i i tij performon më mirë se agjenti Deep Research i OpenAI.

Sipas të dhënave të kompanisë së kërkimit të tregut Tracxn, kompania në prill mblodhi 75 milionë dollarë në raundin Series B të udhëhequr nga firma amerikane e kapitalit të rrezikut Benchmark dhe mbështetet nga Tencent dhe firma e kapitalit privat HongShan Capital Group (HSG), e njohur më parë si Sequoia.

Raportohet se start-up-i e zhvendosi selinë në Singapor në qershor me synim zgjerimin global dhe në korrik largoi nga puna shumicën e stafit të tij në Pekin. CEO i Manus, Xiao Hong, tha në njoftimin për shtyp të kompanisë: “T’u bashkohesh Meta-s na mundëson të ndërtojmë një bazë më të fortë dhe më të qëndrueshme, pa ndryshuar mënyrën se si punon Manus ose procesin e vendimmarrjes.”

Kompania theksoi gjithashtu lidhjet e saj ekzistuese me firmat kineze të teknologjisë, duke njoftuar në mars një partneritet strategjik me ekipin Alibaba Qwen AI. Sipas analistëve, blerja e Manus nga Meta përshtatet me strategjinë e saj për të përfshirë start-up-e të specializuara AI për të përvetësuar talente dhe për të përshpejtuar biznesin më të gjerë të AI, përfshirë zhvillimin e modeleve të mëdha të gjuhës Llama me burim të hapur.

Meta shtoi se punonjësit e Manus do t’u bashkohen ekipeve të saj, teksa kompania vazhdon të transferojë në mënyrë agresive talente të AI nga start-up-e dhe rivalë të mëdhenj, përfshirë OpenAI dhe Google.