Albania News Agency

Presidenti i Malit të Zi, Jakov Milatovic, bëri deklarata në kuadër të Forumit të Sigurisë në Varshavë lidhur me procesin e anëtarësimit në Bashkimin Evropian (BE) dhe përgjegjësitë e ndërsjella mes vendeve kandidate dhe Unionit.

Milatovic theksoi se vendet kandidate duhet të përmbushin detyrimet e tyre, ndërsa BE-ja duhet të mbajë premtimet e saj. “Besimi në rrugën evropiane ndërtohet mbi këtë përgjegjësi të ndërsjellë”, u shpreh Milatovic.

Duke nënvizuar se procesi i anëtarësimit në Bashkimin Evropian duhet të sjellë përfitime konkrete për qytetarët e Malit të Zi, Milatovic tha se ky proces duhet të nënkuptojë institucione të cilave qytetarët u besojnë, zbatim të barabartë të ligjit për të gjithë dhe mundësi më të mira që njerëzit të ndërtojnë të ardhmen e tyre në Mal të Zi.

Duke tërhequr vëmendjen te rëndësia e anëtarësimit të Malit të Zi në BE, Milatovic deklaroi: “Me anëtarësimin e Malit të Zi në BE, do të tregojmë se reformat japin rezultate dhe se e ardhmja evropiane e Ballkanit Perëndimor është e arritshme”.