Albania News Agency

Presidenti i Malit të Zi, Jakov Milatovic, deklaroi se Sllovakia është mike dhe aleate e Malit të Zi, si dhe një partnere e rëndësishme në përfundimin e procesit të anëtarësimit të vendit të tij në Bashkimin Evropian.

Milatovic bëri të ditur se në takimin me Presidentin e Sllovakisë, Peter Pellegrini, diskutuan mbështetjen e ekspertëve sllovakë për përfundimin e negociatave të Malit të Zi me Bashkimin Evropian, si dhe nisma që mund të sjellin përfitime konkrete për qytetarët e Malit të Zi.

Në takim u vu theks i veçantë te forcimi i bashkëpunimit për përdorimin më efikas të fondeve evropiane, mbështetjen e institucioneve publike, rritjen e shkëmbimit të informacionit dhe zhvillimin e mundësive për të rinjtë.

Duke theksuar se synimi i Malit të Zi për anëtarësim në Bashkimin Evropian vazhdon, Milatovic tha: “Mali i Zi do të jetë anëtari i ardhshëm i Bashkimit Evropian.”

Milatovic tha se për arritjen e këtij synimi vendi i tij duhet të punojë me përgjegjësi dhe të vazhdojë me vendosmëri procesin e reformave, duke shtuar se përfundimi i procesit të anëtarësimit në Bashkimin Evropian është ndër prioritetet e Malit të Zi.