Albania News Agency

Presidenti i Malit të Zi, Milatovic, u takua me diasporën malazeze që jeton në Varshavë, kryeqytetin e Polonisë. Në takim u diskutua shndërrimi i mundësive që ofron Evropa në kushte më të mira jetese në Mal të Zi, si dhe shfrytëzimi i njohurive dhe përvojës së malazezëve që jetojnë jashtë vendit.

Në një postim në rrjetet sociale, Milatovic tha se i kupton njerëzit që, megjithëse jetojnë jashtë vendit, mendjen e kanë në atdhe, duke theksuar se takimet me malazezët që jetojnë jashtë kanë një rëndësi të veçantë për të.

Milatovic deklaroi se duan që përparimi në Mal të Zi të mbështetet në dije dhe punë, duke shtuar se synojnë një vend ku të rinjtë të kenë arsye të qëndrojnë dhe ata që kanë shkuar jashtë të gjejnë arsye për t’u kthyer.

Duke theksuar se njohuritë dhe përvoja e malazezëve që jetojnë jashtë vendit janë të vlefshme për arritjen e këtij qëllimi, Milatovic tha se Mali i Zi është shtëpia e tyre, pavarësisht se ku jetojnë. Ai u shpreh se kanë përgjegjësi që lidhja me vendin të jetë njëkohësisht edhe një lidhje me të ardhmen.