Albania News Agency

Ministri i Punëve të Jashtme të Maqedonisë së Veriut, Timço Mucunski, mori pjesë në forumin e biznesit me titull “Turning Sustainability into Competitiveness: Building Resilient Businesses in an Uncertain World”, të mbajtur në Shkup.

Duke folur në forumin e organizuar nga Ministria e Punëve të Jashtme dhe Tregtisë së Jashtme, Oda Ekonomike, Zyra e Koordinatorit të Përhershëm të OKB-së dhe Delegacioni i BE-së, Mucunski theksoi se kompanitë e Maqedonisë së Veriut duhet të përshtaten me ndryshimet gjeopolitike, ekonomike dhe teknologjike për t'u bërë më konkurruese.

Mucunski deklaroi se diplomacia ekonomike është një nga prioritetet kryesore të qeverisë, duke shtuar se synohet zgjerimi në tregje të reja, rritja e investimeve, promovimi i eksporteve dhe krijimi i partneriteteve të reja ekonomike.

Ai gjithashtu theksoi se dialogu i fortë ndërmjet sektorit publik dhe privat, politikat e parashikueshme dhe bashkëpunimi i ngushtë me partnerët ndërkombëtarë janë thelbësore për ndërtimin e një ekonomie më të qëndrueshme dhe më konkurruese.