Albania News Agency

Indeksi referencë i vendit, Indice Bursatil de Capitalizacion (IBC), u rrit me më shumë se 130% pas operacionit të SHBA-së më 3 janar.

Analistët thanë se kjo rritje pasqyron optimizëm se ekonomia e Venezuelës mund të stabilizohet pas vitesh keqmenaxhimi, sanksionesh dhe mospagimesh, si dhe rrit pritshmëritë që qeveria e ristrukturuar mund të tërheqë kapital, të ringjallë prodhimin e naftës dhe të normalizojë marrëdhëniet me SHBA-në.

Emetuesi amerikan i fondeve të tregtuara në bursë (ETF), Teucrium, të premten paraqiti pranë Komisionit të Letrave me Vlerë dhe Bursës (SEC) një aplikim për të krijuar ETF-në e parë të fokusuar te kompanitë me ekspozim ndaj Venezuelës.

Sipas analistëve, investitorët kanë nisur ta çmojnë largimin e Maduros nga pushteti si parakusht për lehtësimin e sanksioneve dhe, në fund, për një marrëveshje ristrukturimi. Kërkesa, sipas tyre, ka ardhur nga një bazë e gjerë investitorësh, përfshirë menaxherë të mëdhenj asetesh të tregjeve në zhvillim, fonde mbrojtëse (hedge funds) dhe specialistë të borxhit problematik që kërkojnë rritje asimetrike.

Megjithatë, strategët theksuan se bursa e Venezuelës është e vogël, jo likuide dhe jo lehtësisht e aksesueshme për investitorët globalë, ndaj luhatjet e çmimeve mund të jenë të tepruara. Indeksi IBC u rrit me 1.644% në vitin 2025.

Investitorët kanë bërë gjithashtu blerje të mëdha të obligacioneve shtetërore dhe të obligacioneve të kompanisë shtetërore të naftës që nga kapja e Maduros. Analistët theksuan se arsyeja kryesore e rikthimit të interesit për obligacionet venezueliane është optimizmi për një ristrukturim të mundshëm të borxhit: “Investitorët e shohin këtë zhvillim si një mënyrë për të çliruar vlerën e ngrirë që nga mospagimi i Venezuelës në vitin 2017.”