Albania News Agency

Sipas DW, bastisjet ndodhën herët në mëngjes në fshatrat Tunga-Makeri, Konkoso dhe Pissa në shtetin Niger.

Fshatrat janë pjesë e rajonit Borgu, pranë kufirit me shtetin Kwara, ku në fillim të këtij muaji militantë islamistë vranë mbi 160 persona.

Sulmi i së shtunës ndodhi në një klimë pasigurie në rritje në Nigerinë veriore, ku autoritetet luftojnë si kundër xhihadistëve ashtu edhe kundër bandave të armatosura të njohura si “banditë”, që rrëmbejnë njerëz për shpërblim.

Sipas autoriteteve dhe banorëve vendas, shumë shtëpi u dogjën gjatë sulmeve.

Zëdhënësi i policisë së shtetit Niger, Wasiu Abiodun, konfirmoi sulmin ndaj Tunga-Makeri.

“Banditë të dyshuar sulmuan fshatin Tunga-Makeri… gjashtë persona humbën jetën dhe disa shtëpi u dogjën”, tha ai, duke shtuar se “një numër i papërcaktuar personash janë rrëmbyer”.

Abiodun konfirmoi gjithashtu sulmin ndaj fshatit Konkoso, por nuk dha më shumë detaje.

Raportohet se shumë persona rezultojnë të zhdukur pas sulmeve dhe ekziston frika se numri i viktimave mund të rritet.