Albania News Agency

Kryeministri i Kroacisë, Andrej Plenkovic, bëri deklarata për çështjet e aktualitetit në vend pas mbledhjes së Kryesisë dhe Komitetit Kombëtar të Bashkimit Demokratik Kroat (HDZ).

Plenkovic tha se janë të kënaqur me rezultatin e HDZ BiH dhe partnerëve të saj të koalicionit në zgjedhjet e përgjithshme në Bosnjë e Hercegovinë, duke deklaruar: “E përgëzojmë Filipovic për fushatën e suksesshme dhe fitoren. Populli kroat ka sërish një përfaqësues legjitim në Presidencën e Bosnjë e Hercegovinës.”

Plenkovic tha se duhet të rriten marrëdhëniet tregtare mes Kroacisë dhe Bosnjë e Hercegovinës dhe të vazhdojnë projektet që lidhin dy vendet, duke shtuar se do të vazhdojnë t’u japin mbështetje të fortë kroatëve në Bosnjë e Hercegovinë.

Duke dhënë informacion edhe për çmimet e karburanteve, Plenkovic tha: “Nga nesër, nafta dhe benzina do të jenë 0,02 euro më të lira për litër, ndërsa nafta bujqësore 0,04 euro më e lirë. Qeveria kroate po mbron qytetarët dhe ekonominë nga rritja e çmimeve globale të energjisë.”

Plenkovic tha se janë të kënaqur me nënshkrimin e kontratës me vlerë 900 milionë euro për ndërtimin e linjës së dytë hekurudhore në aksin Dugo Selo–Novska. Ai njoftoi gjithashtu se në Split do të mbahet Samiti MED9, i cili do të mbledhë nëntë vende mesdhetare anëtare të BE-së.

Plenkovic tha se javën e ardhshme në Parlamentin kroat do të paraqitet raporti vjetor i punës së qeverisë dhe do të shqyrtohet edhe nisma e deputetëve të opozitës për votë mosbesimi ndaj qeverisë. Ai gjithashtu bëri të ditur se rishikimi i buxhetit të vitit 2026 do të jetë në rendin e ditës të mbledhjes së Qeverisë kroate të premten.