Albania News Agency

Një video e filmuar me telefon të martën tregon Sheinbaumin duke folur me një grup mbështetësish në një rrugë pranë Pallatit Kombëtar në qytetin e Meksikos.

Në video shihet një burrë që i afrohet nga pas, përpiqet ta puthë në qafë dhe ta prekë në trup.

Sheinbaum u tërhoq menjëherë, ndërsa një anëtar i stafit të saj ndërhyri, por ishte e qartë se ajo u trondit. Agresori u arrestua.

Në një konferencë për shtyp të mërkurën, Sheinbaum tha: “Mendimi im është ky: Nëse unë nuk paraqes ankesë, çfarë do të ndodhë me gratë e tjera meksikane? Nëse e bëjnë këtë ndaj presidentes, çfarë do të ndodhë me të gjitha gratë në vendin tonë?”

Ajo shtoi: “Vendosa të bëj kallëzim sepse kjo më ndodhi mua si grua, por gjithashtu sepse ne si gra në vendin tonë përballemi me të njëjtën gjë. Më ka ndodhur edhe më parë, kur isha studente, jo presidente.”

Ajo tha se do të vazhdojë procesin gjyqësor, pasi burri dyshohet se ngacmoi edhe gra të tjera në turmë.

Grupet e të drejtave të grave dhe komentueset feministe thanë se ngjarja tregon shkallën e kulturës macho në shoqërinë meksikane, ku disa burra mendojnë se kanë të drejtë të sulmojnë edhe presidenten nëse është grua.

Vrasjet me bazë gjinore mbeten një problem i madh në Meksikë, dhe vlerësohet se 98% e tyre mbeten pa ndëshkim.