Albania News Agency

Sekretari i Shtetit i Shteteve të Bashkuara të Amerikës (SHBA), Marco Rubio, deklaroi se kushtet që mundësuan kthimin e sigurt në vend të udhëheqëses së opozitës venezueliane, Maria Corina Machado, u krijuan falë bisedimeve të pajtimit të mbështetura nga SHBA-ja.

Në një deklaratë të publikuar në rrjetet sociale, Rubio tha se gjatë procesit të dialogut janë liruar qindra të burgosur politikë dhe qindra politikanë të opozitës janë kthyer në vend nga mërgimi.

“Liritë e të gjitha palëve duhet të respektohen”

Rubio theksoi se SHBA-ja pret që të respektohen liritë e të gjitha palëve në jetën politike të Venezuelës dhe u bëri thirrje të gjithë aktorëve politikë në vend të mbështesin procesin e negociatave.

Rubio vuri në dukje se bisedimet e vazhdueshme të pajtimit përfaqësojnë mundësinë më të rëndësishme që Venezuela ka pasur në tri dekadat e fundit për të arritur në mënyrë paqësore jo vetëm zgjedhje të lira dhe të ndershme, por edhe një demokraci të qëndrueshme.