Albania News Agency

Kjo kërkesë e re do të ndikojë vizitorët nga shumë vende që kanë të drejtë të hyjnë në SHBA pa vizë deri në 90 ditë, për sa kohë që plotësojnë formularin ESTA.

Analistët thonë se ky plan i ri mund të paraqesë pengesa për vizitorët potencialë ose të dëmtojë të drejtat e tyre dixhitale.

SHBA pret një rritje të madhe të turistëve të huaj vitin e ardhshëm, pasi së bashku me Kanadanë dhe Meksikën do të organizojnë Kupën e Botës në futboll për meshkuj dhe Lojërat Olimpike 2028 në Los Anxheles.

Dokumenti i propozimit është paraqitur nga Shërbimi i Doganave dhe Mbrojtjes së Kufirit (CBP) dhe Departamenti i Sigurisë Kombëtare (DHS).

Mediet amerikane raportuan se dokumenti është publikuar në Federal Register, revistën zyrtare të qeverisë amerikane.

Në dokument thuhet se “elementi i të dhënave do të kërkojë që aplikantët e ESTA-s të paraqesin llogaritë e tyre të rrjeteve sociale për pesë vitet e fundit”, por nuk jepen detaje të tjera mbi informacionin specifik që do të kërkohet.

Dokumenti gjithashtu propozon mbledhjen e numrave të telefonit dhe adresave të emailit të përdorura nga aplikanti gjatë pesë dhe dhjetë viteve të fundit, si dhe më shumë informacion për anëtarët e familjes.

Teksti i referohet një urdhri ekzekutiv të presidentit Trump të janarit, të quajtur “Mbrojtja e Shteteve të Bashkuara nga Terroristët e Huaj dhe Kërcënimet e Tjera ndaj Sigurisë Kombëtare dhe Publike”.