Albania News Agency

Kryeministri i Malit të Zi, Milojko Spajiç, gjatë takimit me zëvendësdrejtorin menaxhues të FMN-së, Bo Li, theksoi se integrimi evropian duhet të ecë paralelisht me zhvillimin ekonomik dhe përmirësimin e cilësisë së jetës.

Spajiç deklaroi se synojnë t'i japin një shtysë të re zhvillimit duke u përqendruar në energji, turizëm dhe teknologji inovative, si dhe të zgjidhin problemin shumëvjeçar të deficitit të llogarisë korrente. Ai theksoi se përparësia kryesore e qeverisë është rritja e standardit të jetesës së qytetarëve.

Spajiç vuri në dukje se rezultatet e programeve të mëparshme Evropa Sad 1 dhe Evropa Sad 2 kanë forcuar besimin e ndërsjellë për nismat e ardhshme. Ai njoftoi se nga viti i ardhshëm do të fillojë zbatimi i programit të ri qeveritar Euro Model.

Pavarësisht sfidave, si inflacioni i pritshëm i importuar, Spajiç shprehu besimin se vendi do të hyjë në një periudhë të re zhvillimi dhe theksoi rëndësinë e mbështetjes dhe besimit të partnerëve ndërkombëtarë në këtë proces.