Albania News Agency

Ministri i Punëve të Jashtme i Ukrainës, Andrii Sybiha, në një postim në rrjetet sociale, tërhoqi vëmendjen ndaj rreziqeve që paraqesin politikat dhe ultimatumet e Rusisë, duke përmendur shembuj nga historia.

"Këtë e kemi parë edhe më parë", deklaroi ministri Sybiha, duke kujtuar ngjarje të së kaluarës, dhe shtoi:

"Në vitin 2007, në Mynih, Putini e cilësoi zgjerimin e NATO-s si një 'kërcënim'. Në vitin 2008, në Bukuresht, Kremlini lëshoi kërcënime lidhur me mundësinë e anëtarësimit të Gjeorgjisë dhe Ukrainës në NATO; disa muaj më vonë, Rusia pushtoi Gjeorgjinë. Në vitin 2021, Moska kërkoi ndalimin e zgjerimit dhe kthimin te kufijtë e vitit 1997; disa muaj më vonë, Rusia nisi një pushtim në shkallë të plotë kundër Ukrainës."

Sybiha deklaroi se tani i njëjti ultimatum është rikthyer me një emërtim të ri: "Tani i njëjti ultimatum është rikthyer nën një etiketë të re: 'Arkitektura evropiane e sigurisë'. Kjo nuk është një ftesë për dialog. Historia tregon se çfarë vjen më pas: një përshkallëzim i ri i veprimeve armiqësore nga Rusia, përfshirë agresionin e drejtpërdrejtë të armatosur", tha ai.

Sybiha e përfundoi deklaratën e tij me këto fjalë:

"Në vend që të luajmë lojërat e Rusisë, ka ardhur koha të rrisim presionin ndaj regjimit rus, ta detyrojmë Putinin t'i marrë seriozisht përpjekjet për paqe dhe t'i japim fund agresionit të Rusisë kundër Ukrainës."