Albania News Agency

Ministri i Jashtëm i Ukrainës, Andrii Sybiha, njoftoi se forcat pushtuese ruse kanë rrëmbyer 60 civilë, kryesisht gra të moshuara, nga fshati Hrabovske në rajonin Sumy. Sybiha tha: “Rusia e Putinit, me këto bastisje të stilit mesjetar, tregon se nuk është ndryshe nga organizata terroriste si ISIS, Boko Haram apo Hamas”.

Duke kërkuar lirimin e civilëve të rrëmbyer, Sybiha u shpreh: “Këta gjashtëdhjetë persona dhe mijëra civilë të tjerë të dërguar me forcë në Rusi, përfshirë fëmijë ukrainas, duhet të kthehen në shtëpitë e tyre”. Ai u bëri thirrje gjithashtu të gjitha shteteve dhe organizatave ndërkombëtare të veprojnë për lirimin e civilëve të pafajshëm, duke theksuar se ky krim lufte po hetohet në Ukrainë dhe duhet të marrë një përgjigje të përshtatshme ndërkombëtare.

Sybiha shtoi: “Kjo situatë tregon se fqinjësia me Rusinë përbën një kërcënim të vazhdueshëm. Ukraina ka nevojë për një paqe të vërtetë dhe të qëndrueshme. Bashkëjetesa me terroristët kërkon forcë dhe garanci të forta sigurie”.