Albania News Agency

Szijjarto deklaroi se takimi i Orbanit me Putinin ka përfunduar.

Ai tha se nga takimi kanë marrë atë që prisnin: “Siguria energjetike e Hungarisë është e garantuar. Presidenti Putin konfirmoi se Rusia do të dorëzojë sasinë e parashikuar të naftës dhe gazit natyror në kohë dhe plotësisht, si përmes naftësjellësit Druzhba, ashtu edhe përmes gazsjellësit TurkStream.”

Szijjarto shtoi se palët janë dakorduar të përshpejtojnë ndërtimin e termocentralit bërthamor Paks, duke theksuar:

“Të gjitha përgatitjet teknike po ecin sipas planit dhe më 5 shkurt do të fillojnë punimet në terren. Ky është një hap me rëndësi të madhe për furnizimin afatgjatë, të qëndrueshëm dhe me kosto të ulët të energjisë në Hungari.”

Sa i përket luftës në Ukrainë, Orban ka theksuar sërish se Hungaria është pro paqes.

Szijjarto tha: “Për ata që e vënë në dyshim ose e interpretojnë gabim takimin, duam të jemi të qartë: Hungaria, si një vend sovran, ndjek një politikë të jashtme sovrane. Vendimet tona bazohen plotësisht në interesat tona kombëtare. Bashkëpunimi ynë me Rusinë mbështetet në respekt të ndërsjellë dhe realitetet e sigurisë energjetike. Takimi i sotëm e ka forcuar edhe më shumë këtë qasje.”