Albania News Agency

Zëvendëskryeministri dhe ministri i Jashtëm i Italisë, Antonio Tajani, theksoi rolin e konsullatave duke deklaruar se ato janë qendra strategjike për qytetarët, biznesin dhe lidhjet kulturore.

Duke folur për takimin e konsujve dhe fushat e reja të shërbimit, Tajani tha: “Sot në Farnesina (Ministria e Punëve të Jashtme), mblodha më shumë se 170 konsuj italianë nga e gjithë bota për të forcuar shërbimet për më shumë se 7 milionë qytetarë italianë që jetojnë jashtë vendit. Konsullatat janë ‘bashkitë tona në botë’: ne duam të forcojmë kapacitetin tonë për ndihmë të përditshme.”

Duke vënë theksin te shërbimet teknologjike, Tajani shtoi: “Që nga sot, po hapim gjithashtu Sallën e re të Shërbimeve për Qytetarët me teknologji të avancuar për aktivitetet konsullore, të cilat po bëhen gjithnjë e më strategjike për mbështetjen e qytetarëve, bizneseve, eksporteve, kulturës dhe turizmit.”

Tajani e përmbylli mesazhin e tij me fjalët: “Marrëveshja e re me ITA Airways shkon gjithashtu në këtë drejtim; për të lehtësuar udhëtimet për italianët dhe personat me origjinë italiane dhe për të forcuar lidhjet e tyre me rrënjët.”