Albania News Agency

Vendimi i vitit 2009, i njohur si “konstatimi i rrezikut” (endangerment finding), kishte arritur në përfundimin se një sërë gazrash serrë përbëjnë kërcënim për shëndetin publik. Ky vendim ishte baza ligjore, veçanërisht, për përpjekjet federale për të kontrolluar emetimet nga automjetet.

Shtëpia e Bardhë e quajti këtë përmbysje “ç’rregullimin më të madh në historinë amerikane”, duke thënë se makinat do të bëhen më të lira dhe se prodhuesit e automjeteve do të kenë një ulje kostoje prej 2.400 dollarësh për automjet.

Grupet mjedisore thonë se ky është hapi më i madh mbrapa i tentuar ndonjëherë në politikën e klimës dhe se do ta kundërshtojnë në gjykata.

Duke folur të enjten në Zyrën Ovale, Trump tha se vendimi i vitit 2009 ishte “një politikë katastrofike e epokës Obama që i shkaktoi dëme serioze industrisë amerikane të automobilave dhe rriti ndjeshëm çmimet për konsumatorët amerikanë”.

Presidenti republikan shtoi për axhendën klimatike të demokratëve: “Ky rregull radikal u bë baza ligjore e ‘Mashtrimit të Ri të Gjelbër’, një nga mashtrimet më të mëdha në histori”.

Ish-presidenti Barack Obama, i cili rrallë komenton politikat e presidentëve në detyrë, tha se shfuqizimi i këtij konstatimi do t’i bëjë amerikanët më të cenueshëm.

Në një postim në X, ai shkroi: “Pa të, do të jemi më pak të sigurt, më pak të shëndetshëm dhe më pak të aftë për të luftuar ndryshimet klimatike – e gjitha kjo që industria e lëndëve djegëse fosile të fitojë edhe më shumë para”.