Albania News Agency

Kjo është trazira më e fundit që po vë në provë qeverinë e sapokrijuar të presidentit Ahmed al-Shara, e cila po përpiqet të stabilizojë vendin dhe të riintegrohet ndërkombëtarisht pas 14 vitesh lufte civile shkatërruese.

Ministria siriane e Mbrojtjes njoftoi të dielën se, në përgjigje të sulmeve të “grupeve të paligjshme” ndaj civilëve dhe forcave të sigurisë, njësi të ushtrisë të pajisura me tanke dhe mjete të blinduara hynë në qendrat e qyteteve në perëndim të vendit për të rivendosur stabilitetin.

Agjencia shtetërore siriane e lajmeve SANA, duke cituar zyrtarë, raportoi se sulmet gjatë protestave në Latakia ishin kryer nga “mbetjet e regjimit të shpërbërë” të ish-presidentit Bashar al-Assad.

SANA tha se 60 persona u plagosën si pasojë e “therjeve me thikë, hedhjes së gurëve dhe sulmeve me armë”, që synonin si forcat e sigurisë ashtu edhe civilët.

U raportua se përplasjet shpërthyen kur protestuesit u përballën me demonstrues proqeveritarë dhe persona të armatosur me maska hapën zjarr ndaj forcave të sigurisë.

Ministria e Brendshme tha se në mesin e të vrarëve kishte edhe një polic. Ekipi i Al Jazeera-s konfirmoi se ndaj forcave siriane të sigurisë u qëllua në kryqëzimin Azhari në Latakia, ndërsa raportoi gjithashtu se në Tartus sulmues të paidentifikuar hodhën një granatë në stacionin policor El-Anaza në Baniyas, duke plagosur dy punonjës të sigurisë.

Dhunа u rindez të dielën kur mijëra sirianë alevitë dolën në rrugë për të organizuar protesta kundër dhunës dhe diskriminimit në trojet kryesore të pakicës fetare në rajonet qendrore dhe bregdetare të Sirisë.

Protestat u thirrën nga udhëheqësi shpirtëror alevit që jeton jashtë vendit, Gazal Gazal, i cili pas sulmit vdekjeprurës me bombë ndaj një xhamie në Homs të premten bëri thirrje “t’i tregohet botës se komuniteti alevit nuk mund të poshtërohet apo të përjashtohet”.

Sulmi me bombë, që vrau tetë persona dhe u mor përsipër nga një grup sunit i njohur si Saraya Ansar al-Sunna, ishte akti i fundit i dhunës kundër pakicës fetare, së cilës i përkiste edhe ish-presidenti i rrëzuar Assad dhe që kishte peshë të madhe gjatë sundimit të tij.

Protestuesit kërkuan gjithashtu që qeveria të zbatojë federalizmin – një sistem që parashikon largimin e pushtetit nga centralizimi në Damask dhe dhënien e më shumë autonomie pakicave – si dhe lirimin e të burgosurve alevitë.