Albania News Agency

Ministri i Jashtëm i Estonisë, Margus Tsahkna, bëri një deklaratë lidhur me sulmin me zjarrvënie ndaj objekteve të Milrem Robotics në Talin natën e 14-15 gushtit.

Tsahkna tha se, bazuar në informacionin e mbledhur nga Shërbimi i Sigurisë së Brendshme të Estonisë, kishin arritur në përfundimin se sulmi ishte kryer me urdhër të shërbimeve speciale të Federatës Ruse: “Mund të arrijmë me siguri në përfundimin se sulmi me zjarrvënie që ndodhi natën e 14-15 gushtit në objektet e Milrem Robotics në Talin ishte një akt sabotazhi i kryer me urdhër të shërbimeve speciale të Federatës Ruse”.

Tsahkna deklaroi se veprime të tilla janë absolutisht të papranueshme dhe njoftoi se Ministria e Jashtme e Estonisë do të thërrasë të ngarkuarin me punë të Rusisë.

Duke bërë të ditur se autorët e sulmit janë kapur dhe nuk përbëjnë më kërcënim për sigurinë kombëtare të vendit, Tsahkna tha: “Estonia është një mjedis i vështirë për Rusinë për të kryer veprime të tilla, sepse ne veprojmë me vendosmëri dhe shpejtësi për të mbrojtur shtetin tonë”.

Tsahkna pretendoi se akti i sabotazhit është pjesë e një fushate më të gjerë të Rusisë në të gjithë Evropën, duke thënë: “Ky akt sabotazhi është pjesë e fushatës më të gjerë të Rusisë në të gjithë Evropën, që synon të na frikësojë dhe të dobësojë mbështetjen tonë për Ukrainën”.

Tsahkna tha se, si përgjigje, Estonia do të rrisë mbështetjen për Ukrainën dhe presionin ndaj Rusisë: “Përgjigjja jonë do të jetë krejt e kundërta. Do të rrisim si mbështetjen tonë për Ukrainën, ashtu edhe presionin ndaj Rusisë për t’i dhënë fund agresionit të saj”.

Tsahkna shtoi: “Të mos e humbasim fokusin dhe të vazhdojmë përpara, sepse veprimet e Rusisë janë një tregues i qartë se presioni që po ushtrojmë së bashku po funksionon”.