Albania News Agency

Përpjekjet për t'i dhënë fund luftës shumëvjeçare janë përshpejtuar ndjeshëm javët e fundit. Presidenti Donald Trump tha të mërkurën në Shtëpinë e Bardhë: “Shumë njerëz thonë se jemi më afër se kurrë”, duke sugjeruar se një zgjidhje mund të gjendet “shumë shpejt”.

Trump tha se kishte “diskutuar mjaft ashpër” çështjen e Ukrainës me homologët e tij britanikë, francezë dhe gjermanë, të cilët madje kishin propozuar që ai të udhëtonte në Evropë këtë fundjavë për t’u takuar me presidentin ukrainas Volodymyr Zelensky.

“Do të marrim një vendim në varësi të asaj që ata do të përgjigjen,” tha Trump. “Nuk duam të humbim kohë.”

Një diplomat europian tha se bisedimet “po ecin shpejt” mes presionit dhe padurimit të vazhdueshëm të presidentit amerikan.

Më pak se një muaj më parë, nisi një proces intensiv diplomatik pas shfaqjes së një drafti prej 28 pikash, i përgatitur nga SHBA dhe i mbështetur nga Rusia, që synonte t’i jepte fund luftës.

Pas konsultimeve me Kievin dhe një takimi në Moskë, drafti u reduktua nga 28 në 20 pika për t'u bërë më i pranueshëm për të dyja palët në konflikt.

Bisedimet po vazhdojnë dhe mbetet e paqartë nëse Ukraina ka ndryshuar ndonjë gjë në dokumentet e saj në përgjigjen e fundit.