Albania News Agency

Presidenti i Ukrainës, Volodimir Zelenski, falënderoi presidentin e Francës, Emmanuel Macron, për vizionin e tij të qartë mbi mbrojtjen e mënyrës evropiane të jetesës.

Në një deklaratë të publikuar në rrjetet sociale, Zelenski u shpreh se Putini e ka pozicionuar Rusinë kundër Evropës dhe kundër gjithçkaje që çdo evropian e konsideron të rëndësishme, pavarësisht bindjeve të tij politike.

Zelenski deklaroi se, përmes luftës që po zhvillon kundër Ukrainës, Rusia ka treguar qëndrimin e saj të vërtetë ndaj jetës njerëzore, vendeve të tjera dhe çdo lloj rregulli. "Rusia nuk respekton asgjë përveç forcës dhe pikërisht për këtë arsye nevojitet forcë për ta detyruar Rusinë t'i japë fund kësaj lufte", tha ai.

Zelenski theksoi se nëse Evropa nuk është e fortë, do të humbasë gjithçka që vlerëson. Ai shtoi se kjo mund të parandalohet duke e përfshirë Ukrainën në Evropë dhe duke bashkuar forcën e Evropës me atë të Ukrainës. "Paqja vjen kur uniteti i atyre që e mbrojnë nuk i lë luftës asnjë mundësi. Kjo është pikërisht ajo që duhet të arrijmë. Faleminderit, Francë!", deklaroi Zelenski.