Albania News Agency

Presidenti i Ukrainës, Volodymyr Zelensky, njoftoi se gjatë bisedës me presidentin e Finlandës, Alexander Stubb, diskutuan forcimin e kapaciteteve të mbrojtjes ajrore të Ukrainës dhe shtimin e presionit diplomatik ndaj Rusisë.

Zelensky tha se diskutuan mënyrat se si Finlanda mund ta mbështesë Ukrainën kundër sulmeve balistike ruse dhe shtoi se janë në dijeni të rezervave ekzistuese të raketave për sistemet e mbrojtjes ajrore në mbarë botën.

Duke theksuar se Ukraina detyrohet të mbrohet çdo ditë nga sulmet ruse, Zelensky tha: “Nëse secili prej partnerëve tanë ofron mbështetje tani, shumë jetë mund të shpëtohen.”

Zelensky falënderoi presidentin finlandez Alexander Stubb për reagimin e shpejtë dhe gatishmërinë për të ndihmuar, duke shtuar se gjatë bisedës u diskutua edhe procesi diplomatik.

Ai tha se janë shqyrtuar të gjitha hapat që mund ta detyrojnë Rusinë drejt paqes, duke shtuar: “Kur Putini të mos mund të vrasë më njerëz, do të detyrohet të kërkojë një rrugëdalje nga kjo luftë. Paqja është e mundur vetëm me mbështetje të mjaftueshme për Ukrainën dhe rritje të presionit ndaj Rusisë.”