Albania News Agency

Presidenti i Ukrainës, Volodymyr Zelensky, deklaroi se zhvilloi një takim produktiv me Presidentin e Këshillit Evropian, António Costa, dhe Presidenten e Komisionit Evropian, Ursula von der Leyen. Zelensky u shpreh se Rusia nuk po jep asnjë shenjë se është e gatshme t'i japë fund luftës.

Zelensky njoftoi se dy persona humbën jetën dhe 17 të tjerë u plagosën si pasojë e një sulmi rus në Kharkiv. Ai bëri të ditur gjithashtu se një qendër tregtare në Rivne dhe objektet energjetike në katër rajone ishin vënë në shënjestër. Zelensky u shprehu ngushëllime familjarëve të viktimave.

Gjatë takimit u diskutuan ndihma shtesë për nevojat energjetike dhe mbrojtjen ajrore të Ukrainës, mbështetja për qëndrueshmërinë financiare të vendit gjatë vitit të ardhshëm, si dhe procesi i integrimit evropian. Zelensky e cilësoi hapjen e grupkapitujve të rinj në negociatat me Bashkimin Evropian si një zhvillim të rëndësishëm dhe theksoi se po punohet për hapjen e dy grupkapitujve të mbetur deri në fund të vitit.