Albania News Agency

Ambasada e SHBA-së në Ankara paralajmëroi qytetarët për përpjekjet mashtruese në lidhje me aplikimet për viza.

Në deklaratë thuhet se disa persona përpiqen të mashtrojnë duke premtuar përgatitje për intervistën e vizës kundrejt pagesës: “A ju ka thënë dikush se mund t’ju ‘përgatisë’ për intervistën e vizës kundrejt pagesës? Ky është një mashtrim”.

Ndër metodat e zakonshme të mashtrimit përfshihen faqet e rreme të internetit, email-et që premtojnë viza kundrejt pagesës dhe ndërmjetësimet përmes palëve të treta.

Theksohet se aplikanti është përgjegjës për përmbajtjen e aplikimit të tij: “Nëse jepen informacione të pasakta, aplikimi mund të refuzohet dhe hyrja në SHBA mund të ndalohet përgjithmonë”.

Ambasada gjithashtu theksoi se personat që kryejnë mashtrime me viza do të ndiqen penalisht.

Gjithashtu u kujtua se edhe në vendet e Bashkimit Evropian (BE) ka paralajmërime për metoda të ngjashme mashtrimi dhe qytetarët duhet të përdorin vetëm kanalet zyrtare.