Albania News Agency

Autoritetet e Bashkimit Evropian mbrojtën rregullat digjitale kyçe pas vendimit të administratës Trump për të ndërmarrë veprime kundër "një makinerie të krijuar për të nxitur censurën" dhe për të vendosur sanksione, përfshirë ndalimin e vizave për ish-komisarin e BE-së.

Komisioni Evropian në një deklaratë të tij tha se "e dënon me forcë" vendimin e SHBA-së dhe theksoi se liria e shprehjes është "një të drejtë themelore në Evropë dhe një vlerë themelore që ndan me SHBA-në në botën demokratike".

Brukseli theksoi se BE ka të drejtën sovrane për të rregulluar tregun e tij digjital në përputhje me vlerat e tij dhe se rregullat e tij zbatohen "drejt dhe pa diskriminim".

Komisioni tha se, nëse është e nevojshme, do të përgjigjet shpejt dhe me vendosmëri ndaj "masave të padrejta" nga SHBA për të mbrojtur autonominë e tij rregullatore.

Rregullat digjitale u bënë një pikë tensioni midis Uashingtonit dhe Brukselit, duke akuzuar secilën palë se po politizonte ato që duhen të jenë rregulla standarde të tregut për kompanitë që veprojnë në BE.

Ndërkohë, Presidenti francez Emmanuel Macron, pas ndalimit të vizave për ish-komisarin e Bashkimit Evropian Breton, akuzoi Uashingtonin për politiken e frikësimit dhe tha se kjo ishte një "presion që synon të dëmtojë sovranitetin digjital të Evropës".

Presidenti francez, i cili ka bërë fushatë prej kohësh për autonominë strategjike, theksoi se rregullat digjitale që rregullojnë tregun e BE-së duhet të përcaktohen nga evropianët dhe vetëm nga evropianët.

Macron tha se ka biseduar me Bretonin pas shpalljes së ndalimit të vizave dhe se "i ka falënderuar për kontributin e tij të rëndësishëm në shërbim të Evropës".

Presidenti francez shkroi në një postim në X se "do të qëndrojmë me vendosmëri kundër presionit dhe do të mbrojmë evropianët".

Breton, i cili gjatë periudhës së presidencës së Ursula von der Leyen ka qenë Komisar i Tregut të Brendshëm të Evropës, ka luajtur një rol të rëndësishëm në hartimin e Ligjit për Shërbimet Digjitale (DSA), i cili ka për qëllim të mbajë përgjegjës platformat sociale dhe ato të mëdha online për përmbajtjen që ata publikojnë.