Albania News Agency

Sipas raportimit të shërbimit në anglisht të China Central Television (CCTV), China Global Television Network (CGTN), delegacioni iranian ka mbërritur në Islamabad në kuadër të bisedimeve për konfliktin në vazhdim dhe armëpushimin e brishtë mes Iranit dhe SHBA-së. Bëhet e ditur se bisedimet janë pjesë e përpjekjeve diplomatike për të arritur një armëpushim të qëndrueshëm dhe për t’i dhënë fund luftimeve në rajon.

Delegacioni iranian drejtohet nga kryetari i parlamentit Mohammad Bagher Ghalibaf, ndërsa pala amerikane përfaqësohet nga zëvendëspresidenti JD Vance. Pritet që palët të negociojnë për ta bërë të përhershëm armëpushimin dyjavor të shpallur më herët.

Raportohet se presidenti i SHBA-së Donald Trump ka paralajmëruar për masa më të ashpra në rast se bisedimet nuk japin rezultat, ndërsa pala iraniane ka paraqitur disa kushte para negociatave. Ndër këto janë moszgjerimi i konfliktit në rajon dhe lirimi i aseteve të ngrira të Iranit.

Bisedimet e zhvilluara me ndërmjetësimin e Pakistanit konsiderohen me rëndësi kritike për procesin diplomatik të nisur pas përshkallëzimit të krizës në shkurt, që e çoi rajonin drejt një konflikti të gjerë.