Albania News Agency

Departamenti i Drejtësisë i SHBA-së ka nisur t’i bëjë publike mijëra faqe fotografish dhe dokumentesh lidhur me Jeffrey Epstein. Publikimi u bë i mundur pas hyrjes në fuqi të ligjit të miratuar gjatë administratës Trump, i njohur si Ligji për Transparencën e Çështjes Epstein. DOJ theksoi se procesi po zhvillohet me kujdes për shkak të redaktimeve të detyrueshme ligjore dhe respektimit të urdhrave gjyqësorë.

Zyrtarët e ministrisë nënvizuan se në dokumentet e publikuara janë fshehur vetëm të dhënat që lidhen me viktimat, të miturit ose viktimat e mundshme, si dhe informacioni që duhet të mbrohet ligjërisht. Nuk është bërë asnjë redaktim për persona të famshëm apo figura të njohura politikisht.

Heqja e përkohshme e disa dokumenteve dhe fotografive lidhet me shqyrtimet e kryera me kërkesë të personave që pretendojnë se janë viktima dhe të avokatëve të tyre. DOJ bëri të ditur se më shumë se 200 avokatë kanë marrë pjesë në proces dhe se shqyrtimi i secilit dokument dhe fotografi ka marrë shumë kohë.

Gjithashtu, në deklaratën e DOJ thuhet se përpara publikimit të këtyre dosjeve, gjyqtarë të ndryshëm kishin refuzuar kërkesat e Ministrisë së Drejtësisë gjatë periudhës së Trump-it, por pas hyrjes në fuqi të ligjit, gjykatat i kanë pranuar këto kërkesa.

Ministria njoftoi se publikimi do të vazhdojë dhe se dosjet do të bëhen publike gradualisht. Qëllimi është sigurimi i transparencës dhe informimi i publikut pa dëmtuar viktimat.