Albania News Agency

Sipas Zyrës së Sherifit të Qarkut Nevada, orteku u raportua rreth orës 11:30 sipas kohës lokale në zonën Castle Peak pranë qytetit Truckee.

Grupi prej 16 personash përbëhej nga katër udhërrëfyes dhe 12 klientë. Kushtet e motit mbeten të rrezikshme dhe mundësia për ortekë të tjerë është e lartë.

Sherifi tha se janë angazhuar “ekipe shpëtimi me ski jashtëzakonisht të afta” nga dy qendra skish aty pranë. Ai shtoi se gjashtë të mbijetuarit e njohur janë udhëzuar “të strehohen në vend, sa të lejojnë kushtet”.

Në një deklaratë të publikuar pasdite të martën në Facebook, sherifi tha: “Të paktën gjashtë skitarë i mbijetuan ortekut dhe qëndruan në zonën e ortekut duke pritur shpëtim; dhjetë skitarët e tjerë, në kohën e kësaj deklarate, ende nuk ishin gjetur.”

Sherifi tha gjithashtu: “U angazhua edhe një ekip SnoCat”, duke iu referuar mjeteve me zinxhirë për lëvizje në dëborë, të cilat zakonisht përdoren në qendrat e skive për rrafshimin e dëborës.

Ekspertë nga qendra e afërt Boreal Mountain Ski Resort dhe Alder Creek Adventure Center gjithashtu po përpiqen të arrijnë zonën.

Në deklaratë thuhej: “Aktualisht operacioni i shpëtimit po vazhdon me 46 ekipe të reagimit të parë emergjent. Kushtet e motit vazhdojnë të jenë jashtëzakonisht të rrezikshme.”

Për shkak të erërave të forta dhe dukshmërisë së ulët, qendra e skive vendosi të mbyllet të martën.

Stuhia mbylli gjithashtu shumë autostrada, përfshirë Interstate 80 dhe Highway 50.