Albania News Agency

Kompania ruse e teknologjisë Yandex njoftoi se qendrat e saj të të dhënave në Sasovo dhe Kaluga u dëmtuan nga sulmet me mjete ajrore pa pilot (dronë).

Sipas deklaratës së kompanisë të publikuar më 9 tetor, gjatë natës mes 7 dhe 8 tetorit qendra e të dhënave në Sasovo pësoi dëme serioze dhe aktiviteti i objektit u ndërpre plotësisht. Në mëngjesin e 9 tetorit, një tjetër qendër të dhënash në Kaluga u sulmua. Një pjesë e infrastrukturës së këtij objekti doli jashtë funksionit.

Yandex njoftoi se në të dyja incidentet nuk pati punonjës të lënduar. Kompania tha se ekipet e emergjencës dhe specialistët e saj po vazhdojnë punën në terren dhe po vlerësohet shkalla e dëmeve në infrastrukturë.

Vazhdon puna për rikthimin e shërbimeve

Kompania theksoi se qendrat e të dhënave kanë rëndësi kritike për shërbimet dixhitale të Yandex dhe se ndërprerjet mund të ndikojnë në aktivitetet e përditshme të përdoruesve dhe në funksionimin e bizneseve.

Yandex njoftoi se ekipet po punojnë ditë e natë për të siguruar vazhdimësinë e shërbimeve dhe për të mbështetur përdoruesit dhe partnerët e biznesit të prekur nga ndërprerjet.

Kompania tha se ende nuk dihet se kur pajisjet në qendrat e të dhënave do të rikthehen në funksion, duke shtuar se publiku do të informohet sapo të ketë informacione të reja mbi gjendjen e infrastrukturës.