Albania News Agency

Sipas CCTV, Kryetari i Parlamentit të Iranit, Mohammad Bagher Kalibaf, bëri një deklaratë lidhur me kushtet për një marrëveshje me SHBA-në.

Kalibaf tha se Teherani nuk do të arrijë asnjë marrëveshje me SHBA-në derisa të garantohen të drejtat e popullit iranian.

Sipas agjencisë zyrtare IRNA, gjatë një seance parlamentare online, Kalibaf theksoi se negociatorët iranianë nuk u besojnë fjalëve dhe premtimeve të “armikut”.

Ai deklaroi se kriteri i tyre janë përfitimet konkrete që duhet të sigurojnë në këmbim të përmbushjes së angazhimeve dhe se nuk do të miratojnë asnjë marrëveshje derisa të sigurohen që të drejtat e kombit iranian janë të garantuara.

Duke theksuar “sukseset” e Iranit në fushën e betejës, Kalibaf nënvizoi se detyra e diplomacisë është t’i shndërrojë këto fitore në përfitime politike dhe juridike.

Ai paralajmëroi se në një fazë të re të konfliktit, armiqtë po përpiqen të krijojnë trazira të brendshme përmes presionit ekonomik dhe propagandës mediatike për ta detyruar Iranin të dorëzohet, por shprehu besimin se populli iranian do t’u rezistojë.