Albania News Agency

Kanadaja ka miratuar masa të reja sanksionuese për të kufizuar kapacitetet ushtarake të Rusisë dhe për të rritur koston ekonomike të sulmeve të saj kundër Ukrainës.

Ministrja e Jashtme e Kanadasë, Anita Anand, gjatë një deklarate në kuadër të Takimit të Ministrave të Jashtëm të G7 në Paris, njoftoi se 38 organizata dhe 24 individë janë shtuar në listën e sanksioneve sipas Rregullores së Masave të Posaçme Ekonomike ndaj Rusisë.

U bë e ditur se sanksionet e reja synojnë të zvogëlojnë kapacitetet ushtarake të Rusisë duke goditur elemente të ndryshme të industrisë së saj të mbrojtjes. Në këtë kuadër, masat drejtohen ndaj aktorëve të përfshirë në zhvillimin e teknologjive të raketave balistike, si dhe individëve dhe organizatave të lidhura me aktivitetet kibernetike ruse.

Sanksionet përfshijnë gjithashtu masa ndaj ndërmjetësve financiarë që mbështesin ekonominë ruse të luftës, përfshirë bursat e kriptomonedhave.

Ministrja e Jashtme e Kanadasë, Anita Anand, deklaroi se po ndërmerren hapa për të dobësuar aftësinë e Rusisë për të goditur me raketa zonat e banuara nga civilët në Ukrainë. Ajo theksoi se sanksionet do të vazhdojnë derisa Rusia t'i japë fund agresionit të saj dhe të respektojë sovranitetin dhe integritetin territorial të Ukrainës.

Sipas të dhënave të Ministrisë së Jashtme të Kanadasë, që nga viti 2014 vendi ka vendosur sanksione ndaj më shumë se 3500 individëve dhe organizatave të përfshira në shkeljen e sovranitetit dhe integritetit territorial të Ukrainës ose në shkelje të rënda dhe sistematike të të drejtave të njeriut, si dhe ndaj më shumë se 700 anijeve.