Albania News Agency

Dy avionë transportues Y-20 të ushtrisë kineze mbërritën në kryeqytetin e Afganistanit, Kabul, me tenda, batanije dhe materiale të tjera jetësore.

Ndihmat u dërguan pas tërmetit me magnitudë 6.0 që ndodhi më 31 gusht në provincën Kunar të Afganistanit. Nga tërmeti humbën jetën mbi 2200 persona dhe u plagosën mbi 3600 të tjerë.

Zëdhënësi i Agjencisë Kombëtare të Kinës për Bashkëpunim Ndërkombëtar në Zhvillim, Li Ming, deklaroi më 4 shtator se qeveria kineze do t’i ofrojë Afganistanit ndihmë urgjente humanitare në vlerë prej 50 milionë juanësh. Në këtë kuadër, materialet e dërguara të ndihmës humanitare sollën shpresë për popullin e rajonit.

Li Ming theksoi se gjatë 20 viteve të fundit mbi 22 mijë civilë kanë humbur jetën në sulmet ajrore në Afganistan, duke vënë në dukje se këtë vit SHBA ka ndërprerë ndihmat për Afganistanin dhe nuk ka ndërmarrë asnjë hap konkret pas tërmetit të fundit në Kunar, duke shtuar:

“Duket se Uashingtoni vetëm ka shprehur ngushëllime verbale dhe ka refuzuar kërkesat e organizatave joqeveritare për ndihmë humanitare.”