Albania News Agency

Pikat kryesore nga deklarata e zëdhënëses së Shtëpisë së Bardhë Leavitt janë si më poshtë:

"Nën udhëheqjen e Presidentit Donald Trump, regjimi terrorist i Iranit po mposhtet. Toleranca 47-vjeçare ndaj shtetit që është sponsori më i madh i terrorizmit në botë ka marrë fund. Udhëheqësit terroristë të Iranit po paguajnë për krimet e tyre kundër Amerikës.

Që nga viti 1979, regjimi iranian ka lehtësuar vrasjen e amerikanëve. Ata brohorasin 'Vdekje Amerikës' dhe financojnë terroristë radikalë që sulmojnë vendin tonë. Ata pushtuan ambasadën tonë në Teheran dhe morën peng 66 amerikanë. Në Bejrut, një kamion bombë vrau 241 ushtarë amerikanë. Në Irak ata vranë ose plagosën rëndë qindra ushtarë amerikanë. Kjo është vetëm një pjesë e vogël e historisë së tyre të përgjakshme.

Udhëheqësit e mëparshëm nuk e përballuan këtë kërcënim me forcën e duhur. Disa si Barack Hussein Obama dërguan para në dorë dhe nënshkruan marrëveshje që e vendosën Iranin në rrugën e zhvillimit të një bombe bërthamore.

Pas viteve të politikave të qetësimit, Presidenti Trump veproi. Presidenti Trump po e mban këtë regjim përgjegjës dhe po shkatërron objektivat e tij bërthamore. Brezat e ardhshëm do ta kujtojnë këtë moment si fundin e kërcënimit nga një Iran me armë bërthamore.

Në operacionin Operation Epic Fury të nisur javën e kaluar, Presidenti Trump i përcaktoi qartë objektivat.

Së pari, të shkatërrohen raketat balistike të regjimit iranian dhe të eliminohet plotësisht industria e raketave.
Së dyti, të shkatërrohet marina iraniane. Deri tani janë shkatërruar më shumë se 20 anije iraniane, përfshirë nëndetëset më të rëndësishme. Në Gjirin Persik, Ngushticën e Hormuzit dhe Gjirin e Omanit nuk ka mbetur asnjë anije iraniane në lëvizje.
Së treti, të eliminohet kapaciteti i forcave përfaqësuese të regjimit për të kryer sulme në rajon.
Së katërti, të sigurohet që Irani të mos ketë kurrë armë bërthamore.

Deri tani Operation Epic Fury ka qenë një sukses i madh. Forcat amerikane kanë goditur më shumë se 2 mijë objektiva dhe kanë shkatërruar qindra raketa balistike, sisteme lëshimi dhe dronë. Pritet që së shpejti të arrihet kontroll i plotë i hapësirës ajrore të Iranit.

Qershorin e kaluar operacioni Operation Midnight Hammer shkatërroi tre nga objektet më të mëdha bërthamore të Iranit. Megjithatë regjimi iranian u përpoq të rindërtonte programin e tij bërthamor.

Presidenti Trump dërgoi dy negociatorë të nivelit të lartë për të arritur një marrëveshje. SHBA ofroi heqjen e sanksioneve, furnizim falas me karburant për programin civil bërthamor dhe mundësi investimesh të përbashkëta. Në këmbim Irani duhej të hiqte dorë plotësisht nga pasurimi i uraniumit. Por Irani i refuzoi këto oferta.

Kjo tregoi qartë se prioriteti i udhëheqjes iraniane është zhvillimi i armëve bërthamore. Presidenti Trump vlerësoi se kjo do të çonte në shkatërrime të mëdha nga një regjim terrorist me armë bërthamore.

Operation Epic Fury u nis për të eliminuar këtë kërcënim dhe për të garantuar sigurinë e Amerikës. Udhëheqja iraniane mendoi se Presidenti Trump do të vepronte si liderët e mëparshëm, por kjo doli të ishte një llogaritje e gabuar.

49 nga drejtuesit më të lartë të regjimit iranian, përfshirë udhëheqësin fetar, janë eliminuar.

Shprehim ngushëllimet tona për familjet e gjashtë ushtarëve amerikanë që humbën jetën gjatë operacionit Operation Epic Fury. Këta heronj dhanë jetën duke mbrojtur vendin tonë dhe sakrifica e tyre nuk do të harrohet kurrë.

Që nga fillimi i operacionit më shumë se 17 mijë e 500 amerikanë janë kthyer të sigurt në shtëpi nga Lindja e Mesme. Vetëm dje më shumë se 8 mijë e 500 persona mbërritën në SHBA.

Shtetasit amerikanë në Lindjen e Mesme që dëshirojnë të kthehen në SHBA u kërkohet të regjistrohen në step.state.gov. Administrata organizon fluturime charter falas dhe opsione për fluturime komerciale.

Administrata Trump nuk do të ndalet derisa çdo amerikan të kthehet i sigurt në shtëpi dhe kërcënimi nga Irani të eliminohet plotësisht."