Albania News Agency

Presidenti i Brazilit Luiz Inacio Lula da Silva bëri një deklaratë për 100 ditët e para të programit “Todos por Todas”, i nisur me bashkëpunimin e pushtetit ekzekutiv, legjislativ dhe gjyqësor.

Presidenti Lula deklaroi se në kuadër të operacioneve kundër vrasjeve të grave dhe dhunës ndaj grave janë arrestuar më shumë se 6 mijë e 300 persona.

Lula bëri të ditur se qendrat mbështetëse për gratë kanë ofruar 148 mijë shërbime që nga fillimi i vitit. Ai shtoi se kërkesat për shërbime në linjën Ligue 180 janë rritur me 14 për qind, ndërsa ankesat me 23 për qind. Në deklaratë thuhet gjithashtu se më shumë se 6 mijë e 500 gra mbrohen me pajisje portative gjurmimi të integruara me byzylykët elektronikë të agresorëve.

Lula theksoi se proceset gjyqësore janë përshpejtuar, duke ulur kohën e shqyrtimit të masave urgjente mbrojtëse nga dy javë në tre ditë dhe duke bërë që 90 për qind e kërkesave të shqyrtohen brenda 48 orëve.

Lula deklaroi se janë miratuar 27 projektligje dhe një amendament kushtetues për mbrojtjen e grave, duke theksuar se siguria e grave duhet të përfshijë të gjitha fushat e shoqërisë, nga arsimi deri te mjedisi dixhital.