Albania News Agency

Kryeministrja italiane Giorgia Meloni tha se rritja e çmimeve të karburanteve për shkak të tensioneve ndërkombëtare po ushtron presion mbi transportin, bujqësinë dhe çmimet e konsumit, ndaj qeveria ka ndërmarrë një hap të ri për uljen e çmimit të naftës.

Meloni bëri të ditur se Këshilli i Ministrave ka miratuar një dekret që parashikon uljen e menjëhershme të taksës mbi naftën.

Ajo theksoi se kjo masë nuk do ta zgjidhë plotësisht problemin, por është një hap i shpejtë dhe i përgjegjshëm duke marrë parasysh mundësitë aktuale ekonomike dhe zhvillimet ndërkombëtare.

Meloni shtoi se qeveria po ndjek nga afër zhvillimet ndërkombëtare dhe konfliktet, dhe nëse do të jetë e nevojshme do të mblidhet sërish para skadimit të vendimit për të shqyrtuar masa shtesë.

Ajo deklaroi se qeveria do të vazhdojë të marrë të gjitha masat e mundshme për të mbështetur qytetarët dhe sektorët që kontribuojnë në ekonominë e vendit.