Albania News Agency

Presidenti i Malit të Zi Jakov Milatovic deklaroi se puna e zjarrfikësve, të cilët rrezikojnë jetën çdo ditë, duhet të marrë vlerësimin që meriton dhe foli për standardet profesionale dhe rregullimin e pagave.

Duke tërhequr vëmendjen te përgjegjësia që mbajnë zjarrfikësit, Milatovic tha: “Mbështes kërkesat e zjarrfikësve! Puna, përgjegjësitë dhe rreziqet e njerëzve që çdo ditë rrezikojnë jetën e tyre për të mbrojtur të tjerët meritojnë të vlerësohen siç duhet.”

Milatovic tha se i konsideron të justifikuara kërkesat konkrete lidhur me koeficientin e pagës dhe të drejtat e punës: “E konsideroj të arsyeshme kërkesën që koeficienti për zjarrfikësin-shpëtimtar të rritet nga 7,3 në të paktën 9,5 dhe që të gjitha shtesat, kushtet e punës dhe llogaritja e të drejtave të pensionit të rregullohen në mënyrë të qartë dhe të barabartë.”

Duke bërë një krahasim me funksione të tjera publike, Milatovic tha: “Për krahasim, në Ligjin për pagat dhe të drejtat e tjera që lidhen me ushtrimin e funksioneve në gjyqësor dhe Gjykatën Kushtetuese, të cilin Parlamenti ma paraqiti sot për vendim, parashikohet një koeficient prej 34, pesë herë më i lartë se koeficienti aktual i zjarrfikësve.”

Milatovic e përfundoi deklaratën me fjalët: “Gjithashtu mbështes përfshirjen e zjarrfikësve në proceset vendimmarrëse që lidhen me pozicionet e tyre.”